《台南教會報》356卷，1914年11月

廖三重（字道修，1886-1914），是西螺廖龍院（1835-1893）的三男。

廖君三重，儒名道修，就是我所疼所向望e5賢友。「語云知弟莫若師，」解說講，知學生e5款式，獨獨是先生。對明治30年（1897）教士會請我入中學助教，伊就屬二年生，hit時差不多13歲，資質聰明，亦奮志勤讀，真欣慕漢學，見若所考e5攏是3名內。

Ti7中學讀到卒業，hit時費（費仁純，E R Johnson）先生有請伊幫贊教一年久，後來立志beh做傳教e5工，就入神學校，時間內勤勤講究逐項e5學問，時間外真熱心佈道，真好口才，讀到卒業然後koh去東京入明治學院做四年生，卒業了koh入早稻田大學，可惜讀無偌久舊時e5腦病koh起，就轉來台灣歇睏。到這pang koh去日本調養，無扑算去大阪e5海面洗浴，kaN2是無力thang泅，才hou7水tu7死，今年29歲。

照人teh可憐伊對細漢讀冊到今，teh備辦beh做教會e5路用，今kap世間煞，就伊e5才調學問攏toe3水流去；教會也欠1個人才，an2-ne卻有影，m7 ku2上主e5旨意真奧妙，hou7咱be7測tok8 tit。Kiam2-chhai2上主憐憫伊e5腦病，ai3煞伊e5艱苦，所以早早召伊轉去hou7伊享受永遠e5快活，an2-ne卻iau2較好，著o-lo2上主好意思。早前孔子有1個學生姓顏名回，孔子o-lo2伊德行真好，kai3通學e5 gau5讀冊，有幫贊王e5才調。不幸食到32歲過身，這也是hou7人想be7曉tit，廖君三重e5遭遇也是親像an2-ne。  

總講廖君有3項做青年e5模樣。1. 有謙遜e5德行。2.Ai3獻身做主e5工。3.聰明koh興讀。  

鄙人有接著伊e5令兄e5批去西螺赴初二送葬，我真ai3体貼，可惜郵便阻擋，到初二暝接著批，算是過時lah，今無thang koh見伊e5面，著寫幾句來表師弟e5情。