廖得撰 摘自《68回憶錄》 載於《活命e5米糧》37期 1957年6月 p.47-50。原文用白話字，改為漢羅台文如下。

我作穡

我19歲e5時，主安排7分田hou7我作。Hit個田是ti7田洋e5中央，離四面e5庄社攏真遠；田邊有一塊開闊、高跳、青翠、清靜e5草埔。我6日間，ti7 hia作穡；無論犁田、so草、破水e5時；自由吟詩kap心內祈禱；那親像亞當toa3 ti7伊甸（樂園）。真歡喜！中晝toa3 ti7林投腳蔭影e5所在歇睏，讀《真經正懺》；來kap主以及使徒，kap歷代先知聖徒溝通：那親像主kap學生ti7赫文山頂e5情境。真快樂！暗e5時，轉去厝nih食飽，洗腳了，kap老母禮拜清楚，就讀冊；較常讀到3更暝半，老母睏幾若醒，叫幾若遍；我都是kap冊分be7離。真心適！

主日早早食飽，就去5里路遠e5水尾禮拜堂，教人讀字母kap吟詩。一年52禮拜攏專守；無做工、無沃菜、無巡田水。心真清！

日時beh去港邊拾柴，抑是暗時beh去叫工，kap暝時beh去放田水e5時；攏招厝邊知己e5朋友做伴；驚了親像夏娃，孤單去tu2著蛇e5危險！

田起落冬e5時，tu2著落久長雨，心肝想菜買e5,米tiah8-e5,錢借e5,若hou7人食雨飯去就害！透早去beh叫人食飯e5時，天清、星明。佳哉！

Boa2冬草翻了，人閒，家庭無所費；就求主開路賞賜。衙門liam5-piN來teh叫我去做小使；講in所倩e5人，食飽pha-pha走，不時叫無人； koh四界beh ka7人賒物；靠衙門勢，頂下beh kap人冤家，be7用tit。叫我著poah去鬥腳手；我講：「Be7用tit！我toa3衙門，禮拜日無thang專守！」衙門e5人講：「無要緊！禮拜日chiah hou7你攏歇睏！」

後來我koh去toa3衙門，主日早起，頭家boe7起床，頭家娘就先添菜hou7我，叫我先食thang去禮拜。Beh暗，禮拜轉來，頭家娘講：「浴桶水hiaN5燒lah，緊去洗洗thag食飯！」暗時頭家常常好意叫我講：「竹居酒燒燒lim一嘴ah！」Tui3 an2-ne主日m7免做保甲工，有thang守禮拜，有飯thang食，有錢thang theh8！到收冬了，一個姓李e5厝邊，不平講：「In翁某（夫婦）攏少年勇健，歸（全）年做到無暝無日；也我是囝仔，老母五六十歲，這年koh加停52禮拜日；也所趁e5粟仔kap蕃薯，大家差不多平濟！In真m7值！」我應講：「He是上帝恩典賞賜e5！」

早年美國南北e5運搬，攏是倚靠馬車teh交通。有一個駛馬車e5叫做譚，伊一擺ti7禮拜日tu2著腹肚疼真siong重。Tui3 an2-ne hit日就停睏無行。到拜一病好，就koh起行。拜六就jiok著伊hiah e5禮拜日無歇睏e5駛馬車朋友，伊奇怪，就問伊e5伴講：「Lin ti7路中有歇睏一日無？」In講：「無！阮逐日ma7攏照常teh行！」到koh到e5禮拜日，這個駛馬車譚仔就koh將家己所駛e5馬車停睏；拜一koh起行，到拜六暝，koh jiok著in hiah e5禮拜日無歇睏e5馬車隊。Tui3 an2-ni,這個譚仔，就決心禮拜日beh攏歇睏！Hit時起，in人較精英勇健！馬較活動gau5行！車後免koh toa3馬替換！！也無koh駛死馬！譚仔經驗著禮拜日歇睏是大趁錢！後來禮拜日，人beh較濟錢倩伊，伊都無ai3趁！伊講：「禮拜日做工是失本！」

Ti7阮e5厝邊，有一個姓李e5,名叫坎。這個人真勇！真本事！播田師父，無論偌濟人，teh播田，也伊ti7上路尾，會jiok過攏總代先e5,做伊直直破choa7去，無較輸牽索仔e5直。也割稻仔e5時，無論代先偌濟人，伊ti7路尾，都會ka7伊jiok過，雖然鐮lek8仔歹去，伊用手也beh chhoah贏人。伊若擔粟擔，是beh雙擔相疊，人行田岸，伊是行田底，beh擔上車頂e5時，伊擔粟擔，手免hoaN7。kap人相輸食歸poah8桶水，歸飯耒e5肉，伊ka7人播田割稻，若beh創治後場e5查某人，伊就將所有e5飯，ka7伊食了了！這個人後來帶腳風、手風。所生e5後生，查某子攏無活！

 首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述