林謹慎寫  《台灣教會公報》653號，1939年8月

廖承丕翁，ti7（1939年）5月6號別世，享壽69歲。細漢e5時，kap伊e5老父（廖龍院）研究漢學。Tui3明治37年（1904年，hit時伊34歲）當保正起，直到升天，tui3國家、教會、地方貢獻真大。伊bat做街庄長、信用組合長、協議會員等，真久。受官廳kap地方不止尊敬珍重。

Ti7明治38年（1905年），伊有銃後報國，獻¥18.60做軍資。得著下始賜木杯。以後有得著賞台灣紳士章、大禮紀念章、赤十字社總裁表彰、陸軍大臣感謝狀、賞勳局總裁褒狀、愛國婦人會長謝狀。其他iau2真濟，m7免koh講。

論伊e5子女：長男廖溫仁，不幸三年前ti7京都別世，伊是文學士、醫學博士。次男廖溫魁（文奎），是哲學博士。三男廖溫義（文毅），是化學博士。四男廖溫正、五男廖溫進，是商學士。第2媳婦kap第3媳婦，本攏是美國籍。第2媳婦e5學位是B.A （文學士）。第三媳婦學位是B.A. （文學士）。伊3個查某子（玉葉、玉霜、玉梅）攏是高女出身，3個子婿攏是相當e5人物。

論伊e5兄弟：廖煥章kap伊3個子攏是醫學博士。（可惜廖煥章博士，前年ti7上海別世）。廖三重ti7早稻田大學在學中別世。廖行生是經濟學士。門內專是學士、博士，攏是承丕翁一人直接間接e5援助。這kaN2是海嶼中所罕有。

Tui3教會來講，自明治29年（1896年）做執事以來，攏總當執事8年、長老24年。近來因為事業kap身軀軟弱，iau2 ku2心常常teh數念教會。Bat平常日幾若擺到拜堂，四圍巡巡看看，斟酌計畫，掛慮教會e5經濟kap一般e5狀況。

現時教會厝地是伊28年前獻e5，現時值beh 8、9千箍。拜堂是伊鼓舞會友kap會友硬腳keng起e5。Tui3 3年前有teh計畫拜堂著移轉ti7較tu2好e5所在，就ti7舊年（1938年）買一塊三分外beh做拜堂地，倚5000箍。到beh過世，有遺言著koh獻tau3一萬，是tui3 2、3年來就有按算beh獻e5。

伊e5做人：是真有理智。若有理氣，3歲囝仔伊to聽伊。Tui3教會獻金：伊若詳細斟酌了後，有in m7 bat無寄。有幾若擺，是無in來寄。伊若知會友果然有真盡力亦做be7到e5，伊攏歡喜包尾。伊beh做好事，無ai3人知。伊幾若擺叫執事著斟酌調查教會有偌多艱苦人，就暗靜幫助in。伊也bat叫人提提錢幫助艱苦人。伊也bat寄錢幫助某自由e5傳道者。

伊e5注意力真強。身軀雖是真厭sian7， iau2 ku2伊時時真緊張。這是平常人所無e5。平常kiam2 chhai2較無閒，最近ti2病床中，確實真致意赦罪稱義e5恩典。出力備辦心beh見主e5面，無驚死。人若去探伊，伊上愛是kap伊祈禱。

今天父e5旨意成，thau2放伊e5勞苦，入主e5榮光快樂。教會聽伊過身，偌濟人有ai ai chip8 chip8，為伊流m7甘e5目屎。求主安慰伊e5遺族。