廖三重（字道修，1886-1914），是西螺廖龍院（1835-1893）的三男。母親程笑（程英，1851-1899，1894年1月27日由甘為霖牧師受洗）是程立（1879年受洗，是西螺地區最早的基督教信徒之一）的女兒。長兄廖承丕（1871-1939），前後擔任西螺教會長老35年。廖三重於1899年由梅監霧牧師（Rev. Cambell N. Moody）受洗，1902年就讀神學校準備當傳道，畢業後留學日本東京明治學院與早稻田大學，成績優等，是廖家公認的天才，不料罹患腦疾，治療幾年，但仍不幸過世，享年29歲。茲錄林茂生撰「敬弔廖三重君」一文，原刊於《台南府城教會報》第355卷，1914年10月，文是用白話字寫的。

---

敬弔廖三重君

廖君三重，儒名道修，是嘉義廳西螺教會廖承丕長老e5第3小弟。君自細無父，受寡母kap大兄用基督教家庭e5教育。12歲就入新樓中學，歷年考試攏列優等，在學中受洗禮。君天資明敏，議論縱橫，hou7當時e5先生kap朋友所器重。不才kap君同窗兩年久，受著無棄嫌看做知己，m7但疼惜君e5才情，也一發敬服君e5做人。君15歲失落第一疼e5寡母，16歲卒業中學。Hit-tiap8心有所感動，看破世情，決意入新樓福音書院，講究神學beh備辦做傳教e5工。是知ai3拯救同胞、振興文化，無m7是beh鼓舞基督教e5精神，君e5心志對an2-ne顯明。

君在神學中家己知iau2-boe7有夠額，真致意ai3 koh留學內地，bat幾若擺對我講出hit號志氣。可惜雖然學資饒裕，若是四邊e5境遇m7允，時未到志boe7成。M7知是因為勤讀siuN過頭，抑是因為失意無chhun chhoa2,在神學e5第3年致腦病，過澎湖也koh轉去厝nih調養。過年病較好，才koh來台南接續讀冊。卒業後，君無失落往日e5志氣，得著大兄kap教士會e5允准來東京讀明治學院。君是台灣神學e5學生頭一個來留學e5。

明治41年（1908年）2月11號紀元節，就是君神戶上岸e5紀念日。Hit時君23歲。君到東京了後過兩禮拜，我也來京都，接著君e5批講：「我e5心願雖然足，若是我e5上好e5時陣已經teh beh過。」 嗚呼！君e5苦心thang知。明治43年（1910年）3月就卒業明治學院e5普通部。翻轉年4月入早稻田大學文科。君在東京4年久無be7記tit引chhoa7 hia e5同班來就近道理，就kap陳牧師（按：陳清義）相kap設成「高砂基督教青年會」。逐禮拜會員聚集ti7富士見町e5教會。

我43年（1910年）春天來東京探問君，有親目看見這個會e5活動。到今會e5形式雖然改換，若是精神iau2 ti7 leh。君所做e5工be7無去。是君平生看信主做眾智識e5源頭，一道e5靈火不時ti7心內teh著。可惜會e5人kau7著磨，45年春天舊病koh發作，姑不chiong著休學轉來台灣調養。了後病情反起反倒，koh來九洲福岡試入大學病院打tiap8。不幸食藥無應效。大正3年（1914年）8 月12 號孤身過往ti7做人客e5所在。享壽29 歲。嗚呼！哀哉！君e5死穩當m7 tan7 na7君e5兄弟、家眷、親戚teh傷悲。30歲號做壯，放sak半世e5生涯勤苦用工。背冊箱東奔西走，也向望beh thang將所得著滿腹e5經綸，來獻做上主振興本島文化e5路用。若是beh thai3有「出師未捷身先喪，長使英雄淚滿襟。」（出征boe7贏身軀代先死，久久hou7英雄目屎流到滿胸前）。君e5死是台灣聖會e5大損失。

看君雖然學問tu7才成iau2 boe7出來大經營ti7社會，m7 ku2君e5一生，thang講是代表現代台灣青年e5境遇，時勢e5反動，好學無機會；有人為著學資e5阻擋，有人為著家庭、社會e5 m7允准，致到半世坎坷，看學問親像海洋無船thang過，親像活馬縛ti7死樹，對an2 ne空空囥大志氣隱bat8 ti7山林，這kiam2 m7是現代台灣青年e5境遇嗎？道修君e5死是境遇e5犧牲e5一個。嗚呼！用君e5才來出世ti7 50年以前e5台灣，無hou7外國文明e5壓迫，專心ti7詩文漢學，的確是踏青e5雲直直上。用君e5才來出世ti7 50年以後e5台灣，hit時本島e5教育kiam2-chhai2較振興，讀冊e5門kiam2-chhai2 較開，thang順志氣、順年歲用功，kiam2-chhai2無各樣利鑽仔出皮囊外，會thang得志ma7 ku kaN2。嗚呼！君串串出世ti7這tiap8 e5台灣，三纏四纏時陣過choah8去。況兼東西洋e5學問那煩雜，ai3研究少時陣，空空抱有為e5才、囥遠大e5志，鬱卒過一世人。嗚呼！我深深為著君e5死惜，續為著君至愛e5朋友黃君惠我、張君添丁e5死惜，續為著現代台灣e5青年流一phong2同情e5目屎。

第18世紀e5中葉德國有1個出名e5先生名叫Le5-sin3 （Lessing）著出名e5詩人古萊思德（Kleist）e5傳記，中間有一 cham7 teh講，人ti7世間有三等號，頭一等號是天資真好，koh有齊全e5機會thang培養到成物，到尾建立be7朽爛e5工程ti7地面上；這號人罕tit有；Gi-seng3（Goethe）就是這款e5人。第二等號是雖然有真好e5才，iau2 ku2境遇無順利，身体m7做主，到尾無thang chhun chhoa伊e5才調，不過所boe7 bat行e5路hou7伊踏過，開一條仔路痕仔；這號e5人較濟；尼采（Nietzsche）抑是古萊思德（Kleist）是親像這款。第三等號 是雖然才調較平常iau2 ku2有真好e5境遇thang幫贊伊踏頭前e5人e5路hou7伊較大條，現時e5學者tu2 tu2是an2 ne。廖君三重e5境遇thang講是屬ti7頂面所講e5第二等號。甚mih人會扑無ti7草刺仔e5中間開路痕e5人e5功勞？Toe3後壁行路e5人無hiah快，做頭前開路e5 koh較oh。若將台灣現時精神界e5反動比並戰爭，廖君e5死無各樣，山東半島上陸後為著去探溪流，一個上等兵為著名譽戰死，雖然開路e5人死，是beh勉勵後身e5人，道修君e5死，會koh生出濟濟e5道修，這是草這篇文e5時傷悲中生出一種e5向望。道修君e5死m7是無意思。願天父安慰祝福去hou7廖君三重e5兄弟、家眷kap親戚。

頂面所記廖君e5履歷是照我細漢kap伊做伙所聽見e5來寫，kiam2 chhai2有無齊備e5所在，望看報e5列位寬容。