黃淑惠撰 「和平的日」 《台灣教會公報》 1040期 1968年10月15 日 p.17-18 [原文是白話字]

佇光復節，回憶20年前光復當時，家父（黃俟命牧師，1890-1950)，徛佇美軍佮日軍的中間，來祝禱...

光復當時，家父佇員林教會牧會，阮也攏蹛佇遐。佇員林的東爿坐車成點鐘久，就到風景美麗的小山 （東山），山頂有日本的神社。

佇這個山跤有一所在叫做國民道場，佇遐關美國的俘虜，怹喙鬚鬍鬍，穿破衫，褪赤跤，提畚箕予日本憲兵監督咧做工。閣彼當時日本兵真歹，有時行路過的人撣薰屎佇路裡，美國俘虜欲抾起來食的時，予日本兵sai，踢，實在真可憐。以前這個所在是一個真媠的遊覽地；今因為關美國俘虜紲變做殘忍可怕的禁園，真少人敢行到，驚了受嫌疑來連累，就攏越對邊仔佯無看行過。

彼時佇教會也有濟濟壓迫，咧禮拜的以前著先向東爿宮城遙拜，2禮，2拍手，唱「君が代」，(日本國歌，聖詩的頭一面)了，才有開始禮拜。有時佇禮拜的時也有穿私服的憲兵來，怹毋是欲來禮拜，是欲揣空揣縫陷害教會。特別佇阮的厝閣較是按呢。因為我的先父是做牧師，閣大兄（黃彰輝）去佇英國讀冊。差不多有làng日無人禮拜有憲兵來坐規晡，問東問西，毋捌假捌看冊亦佮jû chháng-chháng。實在予人心不安閣緊張。彼時先父身體欠安離開教會疏開佇市外靜養。見若空襲的時攏真濟（很多）厝邊的人來覕阮的防空壕，因為怹是袂信者，閣怹開防空壕的時攏有掘著死人骨，所以真驚，毋敢覕怹的。雖然阮的也有掘著這款，總是怹知阮是信上帝的家庭，佮阮作伙是較平安。戰爭那劇烈，常常空襲，若過了就看著憲兵閣來揣麻煩。

有一日（8月15日）阮看著附近的日本人聚集佇阮對面的日本人的厝，怹攏坐好勢(正座)佇塌塌米咧聽收音機，逐人向頭咧哮（哭）。過無偌久憲兵閣來又閣來阮兜。阮照常欲好禮款待伊，總是這擺憲兵的態度無相款，真客氣，講話真溫柔對老爸硞硞行禮，用日語講：「黃牧師，大大愛拜託你，請你毋通推辭，佮我來去美兵俘虜營報怹知一個和平的消息。」阮攏莫名奇妙。原來是日本皇帝（天皇）通過收音機宣照日本已經無條件降服啦。老爸真慢才講，「你愛我佮你去是無？」伊講，「是，阮拄才開緊急會議，決定欲拜託你佮阮去，阮知佇這個街裡有真濟人徛起，總是阮只有揀你一個欲做和平使者，因為阮知你是上帝的僕人，你所到的所在上帝的平安也欲到佇遐。請你趕緊穿牧師相佮阮來去。」彼時老爸毋是會曉講英語，連日常的話都講袂真好勢，因為伊破病。阮就幫贊老爸無自由的身軀穿牧師相送伊出門。拄拄彼時教會的傅長老（傅大穆醫師）也來，就坐伊的人力車佮憲兵去。

過幾若點鐘的恬靜的時間，無飛機，無水螺的聲，大家坐佇塌塌米祈禱。人力車的聲，一下看老爸平安轉（回）來啦。大家相爭問講，「阿爸你是去創（做）啥物？」老爸真恬靜慢慢一句一句講出來我去美軍俘擄營，怹看著一個牧師入來，怹真戇愕，靜靜注神看我。因為前到今毋捌有牧師來到這所在。我行到中央，日兵，美兵攏真緊張，期待我毋知欲講甚麼話。彼時我夯起雙手向日兵，美兵講，「願爸上帝的恩典，耶穌基督的疼痛，聖神的相通佮恁眾人佇咧。阿們。」祝禱後，我看美兵流目屎流甲四淋垂，日兵向頭敬禮也有咧握手的。怹佇這個和平的瞬間，兩軍攏用和平的態度，感慨無量的心情，來明白戰勝者佮戰敗者的命運的交換。

老爸講，我袂通袂記得這擺的感激，做上帝的代言者共伊的百姓祝福，實在和平的人君佮人相佮佇咧。