Ti7一個風和日麗e5早起，一位熱心ti7教會e5兄弟來chhoe7我，伊就是澎湖白沙教會第一個接受道理e5黃順田兄。阮互相請安了後，伊ka7我講今仔日beh
chhoa7伊e5老父去台灣，最大e5目的就是伊e5老父已經決心beh信主，因為伊是經廟e5老大，又koh是地方e5長輩，這地方迷信真深，一時beh改變信仰會受人e5攻擊le2罵，為著beh保守伊幾十年來名譽尊嚴，ai3
beh去親戚鄭斗長老e5所在慕道直到受洗禮了chiah
beh轉來。我聽了真歡喜，因為伊e5老父修伯是一位保守，固執看宗教攏是大同e5老人，我這個少歲e5囡仔去引chhoa7伊，常常hou7伊用老輩e5立場來教示我一番，今有這款e5決心，我除了ka7
in祝賀以外，也為著in
e5離別祈禱，求上帝hou7
in一帆風順，平安去，也平安轉來。阮就-an2
ni離別，無想到也是一個永遠e5離別-----
講起順田兄一家e5信主經過：In
e5信主那親像出ti7半強迫，怎樣講？原來順田兄是鄭斗長老e5子婿kap外甥。當澎湖宣道運動ti7林照牧師領導下開始e5時，鄭長老就轉來故鄉赤崁傳福音，做代先就是引chhoa7
in一家。到我受派來白沙教會實習e5時，照我所知，除順田兄e5信仰是忠實ti7上帝以外，順田嫂kap伊e5子兒攏是有名無實，
che是一個信仰複雜e5家庭e5影響：老母是尪姨，有服事一仙祖傳三百外年久e5佛祖，為著an2
ni-順田嫂e5信心親像浮雲，變換不定，耶穌、佛祖攏總好，禮拜日禮拜，年節日拜佛祖，只有一項thang感心e5是in
m7驚別人e5毀謗le2罵iau2-ku2來禮拜，m7
ku2-這個信仰複雜矛盾e5家庭kiam2會經得起這個真大e5試煉？！
光陰teh走親像貓一樣輕e5腳步，ti7不知不覺中teh過，順田兄已經將代誌辦了準備be轉來澎湖，伊e5老父也真誠心teh慕道，
ti7鄭長老hia攏真順序，che
hou7伊真放心。來高雄了後，伊一時買無船票，因為天氣bai2,風湧大，高雄馬公間e5班輪攏停開幾若日，人客真濟，in已經將船票買了，今船有決定下晡beh開，因為伊e5婦人人beh生產，回家心切，就想辦法beh
搭下晡e5船，果然無hou7伊失望。無久「第二公盛」輪載著順田兄kap一百外個旅客衝破風浪向澎湖teh開。M7
ku2-天有不測之風雲！
In kiam2會知未來e5遭遇？
1956年11月16日e5清早tui3馬公來e5消息。「第二公盛」ti7早起loe5著西結附近e5暗礁，有發出緊急求救e5信號，命運未卜，hit日e5天氣真bai2,約略十二級e5風有將海水吹上陸地變做鹹雨，青翠e5草木攏礁去，海湧真兇猛，伊所發出e5聲音那準千萬隻e5吼獅beh吞滅一切e5生命，我真替這隻船e5乘客e5命運擔憂，ti7這款天氣e5中間失事是兇多吉少。無久koh
tui3馬公來e5消息。「第二公盛」輪ti7九點左右已經沈沒，救護船因為風湧大無法接近，無發現有生還e5旅客。這時我iau2
m7知順田兄也是這隻船e5乘客之一，直到一個kap伊做陣來高雄也扑無船票就坐飛機轉來e5兄弟講起e5時chiah知，「ou3!是上帝e5旨意？」我e5心真著急也真艱苦。「這個家庭會堪得這款e5試煉？或是beh因為an2-ni來離開道理？這個beh做未信者攻擊教會e5對象la3,上帝a3!你啥事將這個試煉臨到阮？」我e5心tui3伊an2
ni- te問。接著伊e5大漢子la3,見著我e5面e5時就直直哮，既然代誌已經真實，我就盡力來安慰伊，教會e5兄姐也濟濟聚集ti拜堂teh替in
e5家庭祈禱，阮也攏囥一個向望，就是hou7順田兄會thang平安轉來。後來伊e5大子細細聲ka7我講：伊e5老母也ti7早起生一個查甫嬰仔，A3!
Chiah nih巧合。
生、離、死、別，是人生e5痛苦事，特別是死e5歹消息已經hou7這個家庭失去光彩所chhun
e5是啼哭e5聲kap埋怨e5聲，這個場面hou7人心酸，boe7禁tit流出同情e5目屎，「上帝a3,你啥事beh將試煉臨到這個軟弱e5家庭？啥事beh
hou7自然界來毀滅人e5生命？Che是你e5旨意mah？」伊e5聲那親像tui3我teh講：「萬項代誌tauh8-tauh8-來攏是beh
hou7疼伊e5人得著利益。」
世間事往往攏真巧合，ti7悲劇過後e5一個暗時，順田兄e5老母，伊e5婦人人，kap伊e5小弟攏做一個相像e5夢，就是夢見順田兄穿白衫teh
kap in講話，伊ka7伊e5老母講：「伊已經tiam3
ti7天國，m7免為著伊e5死來煩惱，koh叫伊ai3離開佛祖，來信耶穌，因為陰間m7值著天國。」Ka7伊e5婦人人講：「著專心服事上帝，m7
thang koh ham3-ham3,也著照顧hit個細漢嬰仔。」Tui3伊e5小弟順孟兄講：「當伊beh離開世間e5時，有真濟人e5靈魂beh
kap伊去天國，因為無共路，所以boe7會，也叫伊的確著信耶穌。」Tui3
chia e5夢hou7
in ti7悲傷失望e5中間得著安慰。無久也tui3
hiah e5得救e5人e5中間聽見一個消息，講有一個信耶穌e5人ti7船loe5著礁石teh入水e5時，teh傳道理hou7人聽也teh安慰別人，照死亡名單所知，ti7百外個旅客e5中間，信主e5只有一人，無疑e5伊就是順田兄---一個勇敢e5基督兵士。
苦難是beh
chhoa7人到ti7上帝e5所在，這個就是受苦e5以後，試煉e5代價，月無時常是圓-e5,平安也無時常kap人ti7
teh-，試煉kiam2只有生、離、死、別？Che是人生5現象，自然e5定律，上帝有時beh通過這個來成全伊e5旨意。今順田兄e5死不但無hou7
in e5家庭失落信仰，反轉hou7伊e5尪姨老母離開佛祖來信耶穌，也得著伊e5小弟順孟兄全家。今現在這個信仰複雜e5家庭已經是熱心e5基督化家庭，in
e5棄邪歸正有影響濟濟未信者，也激勵白沙瓦桐、港尾、後寮e5兄弟姊妹。伊親像一粒麥落地今有puh
iN2有長大有結實。伊e5受難有考驗in
e5家庭，用這個考驗做媒介反轉hou7這個家堅固，hou7伊e5老母kap伊e5小弟信主，che
kiam2 m7是上帝e5旨意？當悲劇發生e5時kiam2
m7是未信者e5冷笑、毀謗、譏刺e5聲到ti7
in mah？若是主e5旨意是盤過人所想會到--e5。
兩年外la3-!雖然日頭猶原是光明，m7
ku2-穹蒼e5雲m7知變換幾千擺？我用悲傷e5心懷念過去，Ou3!順田兄伊是hiah
nih8-不幸來死ti7海中，伊e5身屍也無chhoe7著。當阮e5教會需要伊e5時陣，伊就-an2
ni來離開阮。「上帝a3--!你啥事hou7你盡忠e5子兒遭遇這款e5不幸？我知la3-!
因為你e5旨意本是an2
ni-。」今伊已經永遠安歇
ti7你e5胸前，阮也beh為著che來受安慰。當伊ti7天nih8看著家己所結e5果子e5時，伊e5靈魂有得著安慰la3。
所數念e5順田兄，我寫chia
e5來為你做見證，也用an2
ni-來數念你。
