|
|
陳柏壽撰 《台灣教會公報》 3148 期 2012 年6月25日-7月1日 p.25 台文世界。
黃聲宏醫師1938年出世，伊本身佮老爸黃履鰲醫師，以及阿姊黃聰美醫師，攏是內村鑑三先生設立ê日本無教會主義教會ê忠實信徒。伊細漢佇日本長大，1946年回台南，1962年入台北醫學院，1970年對日本北九州久留米醫科大學畢業。1985年起，就佇紐約Scarsdale開業。伊是紐約衞鄉台灣教會會友，擔任聰美紀念基金會主席，2012年5月17日蒙主恩召。
 對New York參加聰美姊紀念基金會主席黃聲宏醫師ê葬式轉來以後，心情真沉重，怨嘆這世間好人hiah-nī緊就回歸天家，怨嘆生命ê無常。雖然知影上帝用伊ê自由佮伊ê意志teh統管這世間，但是這擺我猶原感覺怨嘆。
黃醫師平常無啥愛講話，雖然伊ê老爸黃履鰲醫師kā伊號做「聲宏」，伊講話卻真細聲。20幾年前認識伊以後，伊就是一位良師益友，時時指導、鼓勵、安慰我。20幾年前，我為伊ê老爸做無教會主義形式ê葬式以後，無想到今仔日佇同這間「衞鄉台灣教會」，佮兄姊做伙欲送伊轉去，心內非常毋甘。
黃醫師ê大姊是黃聰美醫師，嫁hō͘日本醫師伊籐邦幸，倆人結婚以後，就sio-chhōa去尼泊爾ê山內，為散赤人做日本基督教團海外醫療傳道ê事工，做20外冬，生6個囝。轉去日本以後，聰美姊每個月為台灣獨立聯盟發行ê《台灣青年》奉獻3萬圓日票將近20冬，攏無出伊ê名。為著記念這種恬恬無私奉獻ê台灣女性精神，阮設立「聰美姊紀念基金會」，用眾人奉獻ê錢來發行《台文通訊》，目前這個網站（www.chhongbi.org）欲將過去500幾本唯一存tī世間ê《台灣青年》雜誌灌入去網站，欲將chiah-ê豐富ê台灣人ê精神資產，留落去、流傳落去，hō͘咱經過chiah-ê資料，得著新ê啟發，奮起台灣人獨立運動ê意志kap行動。黃聲宏醫師一直是基金會ê主席。
注目看上帝 真正ê以色列人
起頭主耶穌teh招學生ê時，看著拿但業khiā 佇樹仔腳teh偷看伊，耶穌叫伊出來。伊問耶穌，你怎樣識我？耶穌講：「你khiā 佇無花果樹腳ê時，我已經看著你啦！」「看啊！這個人就是真正ê以色列人！因為伊ê心內無詭詐。」（約翰福音1章43∼51節）
耶穌講ê「以色列人」m̄ 是指通常ê猶太人，猶太人對雅各開始就含有詭詐ê成分。耶穌講ê「以色列人」是講「Ish-roeh-el」，就是講「目睭看著上帝ê人」ê意思。所有目睭會當看著上帝ê人，攏thang叫做「以色列」。黃聲宏醫師就是一位「真正ê以色列人」。黃醫師靜靜khiā 佇無花果這欉生命樹ê下面看耶穌，就hō͘主認著伊是一位心靈謙卑、清氣、安靜ê上帝ê囝。黃醫師真正是一位心靈ê目睭看會著上帝ê人。不但按呢，耶穌講伊ê目睭會看著天開，看著天使佇天梯起起落落。
咱ê目睭豈有法度看著天門開開，看著天使佇天頂地面起起落落？我想有可能。我想咱毋免等到肉體離開這世間，就有法度看著上帝ê天梯佮靈魂世界ê天使。人ê構造分3部分：頂面ê靈，是創世以來直接佮上帝牽做伙ê部分，就是咱台灣人所講ê「舉頭三尺有神明」仝款意思；第2部分叫做魂，伊包括思想、感情佮意志；第3部分就是咱看會著、摸會著ê肉體。人著死ê攻擊以後，伊ê靈直接轉去上帝遐，伊ê肉體回歸地面ê大自然，但是伊ê魂並無hiah-nī簡單就結束。
咱人ê思想、感情佮意志，是人存在第一明顯ê所在。伊一世人ê心願、愛情、記憶、思想、抱負，攏親像一台咱厝內ê電腦，這台電腦是上帝電腦總部ê末端機，咱一生所講過ê話、所想過ê代誌、所做過ê行為，所有幼年ê經驗，所有孩童時代看過ê草花佮田野，所有ê歡喜佮目屎，所有ê悲哀佮熱情佮希望，一點一滴，甚至咱家己已經bē記tit ê代誌，嘛攏存佇這台末端機內面。上帝ê電腦總機就親像美國國家ê電腦總部，是國家整個ê頭腦。國家電腦總部若是故障，咱tī銀行chhun偌濟錢，「phah！」一聲攏會消失，國家ê重要資訊、軍事機密，「phah！」一聲，攏會失蹤。但是，咱一生ê記錄，佇上帝ê電腦內，永遠bē失蹤，上帝會kā咱記tiâu-tiâu、記kah清清楚楚。Chiah-ê資料就是咱靈魂ê DNA，khǹg 佇上帝「魂」ê寶庫內面。Chiah-ê DNA會經過咱肉體ê後代傳落去，嘛會經過魂ê作用，繼續影響咱地面ê社會，繼續佇環境世界中存在，繼續擴散，繼續執守佇世間。
台 灣 獨 立 未完成ê心願
黃醫師猶未完成ê意志佮心願，上重要ê部分就是「台灣獨立」。「台灣獨立」是黃醫師真重要ê魂ê組成因素ê一部分。以前這個部分佇伊ê頭殼內面時時有掛慮、有衝擊、有鬥爭，chit-má 毋免啦，這部分ê魂已經得著解放啦，毋免閣k經過人ê肉體ê頭腦ê束縛啦，已經飛到天頂啦，已經得著自由啦！伊這部分ê「魂」，因為無閣受著肉體ê阻擋，顛倒變做koh-khah完美，koh-khah直接，koh-khah活動，koh-khah有影響力，有完全ê自由。
肉體ê頭腦將伊ê台獨思想反映出來ê，不過親像一個「鏡」，不過是一個「形而上」ê受動ê「 觀念」而已。但是這个思想，進入「 魂」ê世界以後，會變做一個實存ê存在。混沌ê思想、抽象ê觀念，會變做清楚、實在ê體，存在佇上帝ê世界內面。人ê肉體雖然變老，雖然破病變歹看，但是進入死亡ê門以後，伊ê靈魂會變真súi。死是hō͘靈魂變做美麗ê過程，死是靈魂淨化ê過程。每人去到彼個世界，攏會變做真súi ê人格，變做真完全、真成熟、真理想ê人格ê存在。彼種美麗毋是肉體狀態有法度表現ê美麗，世間一切ê矛盾對立，佇彼所在攏得著統一；但是伊ê人格ê思想、感情、意志ê特質，佇彼所在猶原無改變，不過是受純化。
佇上帝ê世界內面ê「台獨」思想，不但是黃醫師ê思想、感情、意志ê「魂」ê綜合ê實存，koh-khah是一種非常淨化、美麗ê魂ê目標佮動力。這個實存ê魂是超越陳腐ê語言，無受肉體佮物質ê拘束，超越現實世界ê禮儀、衝突佮鬥爭，超越朋友佮敵人ê分野。這種意識ê魂已經升到最高ê位階，是能動ê、絕對自由ê、絕對歸依佇上帝ê世界ê存在。伊已經毋 是觀念ê幻影，毋是空想。伊是純全ê靈魂ê一部分。伊 毋免閣喉叫，毋免大聲，毋免怨嘆，毋免閣為著《台灣青年》ê入網煩惱， 毋免閣為著台灣母語ê流失心慒（cho），毋免閣再佮國民黨ê法統、正統、教條ko-ko-tîⁿ。因為伊ê靈魂活佇完全純情ê世界，活佇太陽ê光輝ê內面。這是我對黃聲宏醫師ê過身所得著ê啟發。
|
