訪植村環牧師

　

首頁Home / 日文文章 / 日人列傳總檔  / 本土信徒總檔  / 宣教師人物總檔 / 外國神父修女列傳總檔/Google Search 網內搜尋

植村環談 吳天命譯 「聽植村環牧師」 《台灣教會公報》 630期 1937年9月 p.28-30 [原文是白話字]；

譯自 Z Y 生「植村環女史を訪ふ」《福音新報》2162號。昭和12年（1937年）8月5日。

按：植村環牧師（1890-1982），1937年2月-12月間擔任台南長老教女學的校長。

台南長老教女學的校長植村環女士，伊也做東京柏木教會的牧師。真gâu照顧指導佇東京留學的本島人（台灣人。家己的教會以外，有真濟要緊的工佇東京，猶過歡喜犧牲真濟，來台南幫贊教會的教育，以及其他也有活動利益佇台灣的教會。這pang學校歇熱（暑假），伊有倒去東京，《福音新報》的記者就去探伊，問伊3 項事：

  1. 東京嘛有朝鮮人，支那人（中國人）咧留學，為甚麼因端你特別出力咧指導台灣人？

  2. 聯合婦人會(植村環牧師做會長)。對台灣人的傳道有什麼計畫？

  3.  佇本島人(台灣人)教會，最近有什麼通予人注目的事？

植村牧師對這3問的應答有記佇2162號。昭和12年8月5日發行的《福音新報》，我拍算真濟兄弟姊妹愛聽伊所應答的，因為伊現時不止咧大幫贊咱的教會。所以翻譯佇遮，是驚了有人無機會通看《福音新報》。

  1. 對第1問的應答。「照你所知，家父（植村正久牧師)有非常用心佇台灣人傳道。對42年前故河合龜輔牧師，為著傳道去台灣以來，家父為著傳道，前後有9擺去台灣。彼中間家父毋但干焦傳道內地人，也想著傳予本島人，所以去台灣的時有佮本島人面會。佇東京嘛招呼本島人；彼中間有陳清義送來東京神學社勉強（讀冊。我的阿姊澄江，也捌教伊的婦人人學英語。(譯者註：澄江樣就是左波亘牧師娘，敢毋是學英語，是學國語才著)。

比這層較早，一番町教會時代，有一个人叫做周天佑（添佑），穿和服縖裙來教會禮拜。真心適，我一擺佇嘉義教會說教的時，有一个老人來對我講，「你會記得我抑未？」這个人就是彼个周天佑氏，現時改名做周福全，咧做醫生；也是信仰的人，咧奉仕教會。嘉義日本基督教會堂建築的時，伊有寄附土地......

閣照你所知，蔡培火樣有佇富士見町教會領洗禮。家父常常苦勸伊，若肯獻身做台灣的傳道者，費用伊欲設法。閣再有設法予台南的醫家高再得夫人，岡山的高再祝夫人佇東京受教育。佮石舜英閣上京的時，家父有提倡設有志的歡迎會，閣有 chhoā 怹去赴富士見町夏期學校佇輕井澤。高再得夫人現時成做這个有力者，會說教佇台灣一的大教會台南的太平境教會。閣再石舜英是有做屏東的財產家李仲義氏的夫人，一兩年前丈夫死了後，有盡力用時間佮錢財咧做傳道的路用。

親像按呢，家父有想台灣本島人教會佮內地教會提攜的事，自然我也佮台灣的人相親密。我佇1922年(譯者註：年間敢有錯誤)，對英國倒來，有踮現在的所在開始傳道，佇附近有台灣的人，算是誘惑真濟，真危險的所在；我就照顧怹。我的教會也有台灣的人出席，也有佮蔡培火氏，高氏用批相交陪。」

  1. 對第2問的應答。「Hiō，現時的役員佮過身去的斉藤好子樣等，有真出力佇這chân事，為著台灣傳道咧祈禱。對按呢，有得著建設向善寮。照定員是男子10名，總是現時有收容12名的本島人學生。對遮的人的中間，也有生出領洗禮--的，大概不時有神學生一兩名佇咧，所以無欠用別人共in指導禮拜。佇我的厝嘛有6名的本島人的囡仔。

閣再台北的上（上與二郎）牧師有拍算本島人傳道的事，所以聯合婦人會逐月日有寄定著的額去，佇台北太平町(譯者註：現時搬佇港町)，有設為著本島人的傳道所。今年日本神學校的出身者梅崎正二郎氏有去赴任，現時咧學台灣話。也想愛派女子婦人傳道者，拄好得著舊年日本神學校卒業的吉成光子樣，做「聯合婦人會親善使」，穿台灣的衫，學台灣話；此後欲為著本島人女子青年來活動。」

  1. 對第3問的應答。「Hiō，有哪。特別愛內地（日本）教會的兄姊來注意的，就是(1)台南長老教，男，女兩中等學校的機構問題。會通照現時的款，貫徹基督教主義教育抑未；這是關係台灣教會盛衰的大問題。阮有盡力欲予當局理解基督教主義教育，總是真為難。(2)本島人教會，最近教勢不止振起。兩年前對支那（中國）有 一个有力的傳道者叫宋（尚節）博士來台傳道，強調「生活一新」的事。對按呢有組織傳道團，青年踮路邊傳道，集會的人數加真濟。(3)一項是第一要緊，就是兩，三年前以來，本島人教會有將種種的問題來參詳求幫贊，向望通佮內地教會接近提攜的事。這是真通歡喜的現象，我想毋通失落這个機會。台灣人的信仰卻是較欠做教會人的訓練佮思想的鍛鍊；總是真單純，閣熱心。內地的信者有受思想的訓練，所以信仰較複雜。按呢若兩爿有無相通的時，就會得通相補彼个長短。閣再佇現時日支（中日）關係紛糾的時，來佮本島人教會提攜幫贊伊，興起伊的傳道；我信這是會通做大陸的支那（中國）人佮日本人結合的接協點。到佇現時西洋人有久久真出力，總是干焦西洋人做袂來，干焦本島人也做袂來，只有佮內地教會做一體的時，才會通解決的事有真濟佇咧。阮來本島人有真gâu感謝，通疼的性質佇咧。對咱這爿開咱的心 來親近怹的時，in會真親切佮咱親密。我信本島人傳道，是上帝交代內地教會的使命。」

    2.  首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述