甘為霖 (Rev. William Campbell) 記 「吳文水」 《台南府城教會報》 100卷 1893年8 月p.79 [白話字原文，改為漢羅台文]

關於吳文水, 1806-1879，可參見《教會史話》131, 140

佇台灣頭1個本地人當傳道佮長老的職，就是吳文水。伊雖然過身已經久，濟濟兄弟iáu teh數念伊，所以佇教會報略仔來講起伊的代誌，穩當會予咱受勉勵soà thang 感謝上帝。

文伯本然蹛漳州，佇遐當糧差；未趁道理的代先也是gâu食鴉片。我有聽見人teh講，三十外年前，長頭毛賊攻破城的時，文伯走去廈門，後來聽道理入教會。

同治4年（1865年），馬醫生（馬雅各，Dr. James L. Maxwell）過來台灣，文伯也佮伊來。起頭兩人ài 蹛府城，總是拄著歹人的阻擋，怹才搬去旗後踮遐做主的工。

因為文伯無偌大bat字，年歲也濟，本身毋敢想別日會當傳道的職，m̄-kú 一二年的中間馬醫生看伊熱心閣真正有好模樣，就教伊暫時去蹛埤頭（鳳山）講道理。彼時chia 的官不止m̄-ài外國人來台灣做生理設教，所以文伯佇埤頭傳福音，百姓的心肝大搖動，致到城內的匪類聚集拆禮拜堂，閣掠長（高長）兄關落監，文伯也險險予怹刣 。同治8年（1869年），遐的事攏辦到明白，官府出告示准人出在伊入教，馬醫生就倒轉來府城，予文伯蹛亭仔腳的拜堂傳道理。

光緒元年（1875年），因為伊身體真腩，煞工過唐山，佇遐 3年久較常倒佇眠床，了後就「倒去佮基督相佮佇-leh」。

對我來台灣的時到伊倒去唐山，我差不多逐日佮文伯交陪，才有詳細bat伊。論伊的款式，這堞 beh 講起4項nā-tiāⁿ：

1. 伊逐日講究聖經。意思是m̄-nā chhoē甚物拄合的道理thang 講出佇禮拜堂，因為文伯掠做上帝的道理，若親像家己的米糧，也知本身代先著受伊的感化，才會堪得報揚予別人聽。 看伊按呢來對重聖經，是予咱會記得大衛王所記，「你的律法，我盡在疼惜，數念到歸日。」

2. 伊逐日專務祈禱。論這個代誌，文伯果然做眾兄弟的好模樣。濟濟人的祈禱是ê昏早起唸幾句真包涵的話才煞，反轉文伯無論甚物時甚物代誌，伊的心定著ǹg向佇頂面，也m̄-nā迫切替別人祈禱，因為伊常常顯出感恩的心為著前所得著的。

3. 伊gâu料理教會的事。二十外年前蹛遮的外國先生到台灣幾若月日nā-tiāⁿ；閣逐所在的教會是設無偌久，所以彼霎這個妥當知影的本地人來鬥幫贊，真正有機會thang做大路用。文伯或是苦勸人或是設法料理代誌，逐家攏知伊毋是為著名聲抑是甚物私-khia 的意思來行。兄弟（信徒）佮教會外的人，歡喜chhoē伊受伊的教示。

4. 伊不管時ài人得著救。日時伊常常去佮厝邊相bat 的人講道理，逐暝昏佇拜堂也佮怹聚集，開拆聖經苦勸人著反悔信靠耶穌。某日，伊按呢 teh傳，有人入來聽堞仔久，心就受感激。願天父予彼個某人iáu久久佇教會內做上帝盡忠的奴僕。伊姓李名叫豹，二十外年前開路去埔社報揚福音，這陣伊佇牛挑灣做傳道先生。