促佮日本基督教會合同

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

吳清鎰撰 「佮日基合同」《台灣教會公報》660號 1940年3月 p.22-23,北部教會 170號。原文是白話字。


日本基督教會佮台灣基督長老教會平平是長老主義的教會,講較明,就是徛佇相款的信仰佮相款的政治組織的教會。這个教會若有愛欲合同,通講是真快的事,因為毋免改換怹的主義,亦毋免變更怹的組織。在來這兩个教會的無相款,不過是關係外皮極小可枝葉的問題若定。所以這兩个教會對早就有親密的交陪佮相援助。兩爿攏咧聽候佇將來有合一的日子。佇兩年前北部傳教師總會,有決議著促進佮日本基督教會合一的事,亦有派委員去研究。佇舊年的北部傳教師總會有閣議論著緊實行合同的事。佇兩年前的日本基督教會大會亦有為著這層事,派數名的協力委員欲榮台灣的要求。關係這層事,日本基督教會一面通講是不止關心,感覺怹的責任,總是佇閣一面是存真好的意思,就是終始(始終)徛佇受動 tek的態度咧聽候咱台灣有家己感覺必要的時才來進行。因為教會的合同的確毋通出佇無理抑是甚物不純的動機。若毋是對信仰上的要求佮自然tek的方法的確袂通得著好的結果。論日本基督教會佮台灣基督長老教會的合同說,到佇今仔日的經過通講是對佇信仰上的要求,也袂捌有發見著有甚物教理上的難關。是久久的向望是極自然tek的進行,決斷毋是忽然間的無理的變革。所以佇今仔日有人主合同,也無聽著人反對。卻有一半的主張講時機尚早總是in的主張毋是有甚物確定的理由。雖然今仔日台灣教會的獻金程度猶毋達著日本基督教會,對傳教師的待遇佮其他關係數字方面的事袂通即時白到佮日本基督教會同程度,總是這毋是會通做阻擋這兩个教會合同的大理由。
論言語的事亦是無問題。因為今仔日傳教師佮代義長老,大概攏捌國語(日語)。這擺咱的新法規的草案也已經是用和文(日文)。若是論佮宣教師的關係也通講是無問題,這陣咱的教會毋是加拿大長老教會,也毋是倫敦長老教會。咱欲做台灣基督長老教會,抑是佮日基合併成做日本基督教會是咱的自由。所以咱佮日基合同,毋是欲佮宣教師絕緣,也毋是欲佮宣教師拍歹感情。所以現在咧援助台灣長老教會的宣教師,佇教會合同後猶原通照怹的好意來援助台灣的日本基督教會。論宣教師的好意,自然合同後台灣的日本基督教會猶原用感謝的心共伊承受佮前無各樣。不過是合同後的教會著益發感覺家己的責任來進步到佇免受援助的地步。按呢論佮日基合同的事既然無有阻擋,也的確毋是時機尚早,通講是真正合時的運動。總是雖然是對佇自然tek的發展,亦著有自然tek的運動。若是攏無關心,攏無訂一个時期通來進行所著進行的,就毋知欲等候到甚物時才會得實現。真拄好佇這3月尾有台灣大會。佇大會有南北合一的問題。南北的合一若會得實現,就大家相佮閣進一步來佮日基合一。萬一南北的合一若袂得實現,就南北通估人佮日基合一。結局對按呢亦會通實現南北的合一。
今年是皇紀(日本紀元)2600年,不論南北的合一會成抑袂,佮日基的合同的確著予伊先,通來做好的記念。

  

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述