潘毛里撰《台灣教會公報》 607卷，1935年10月

---

南崁教會的吳添友長老，佇（1935年）8月25日 有受主揀召離開世間倒去天堂，享壽81歲。吳長老的做人是樸實忠厚，對教會、對國家真出力奉事，有頭、有尾，真誠實清廉、清氣，熱誠信主；hou7人人所數念，一下聽見伊離開世間，真呣甘。

13歲的時就無老父，得著賢母的牽成，到9歲的時，有入書房讀冊。 到14 歲的時就出佇社會來擔當1家的生計，tiam3 佇南崁店仔做淡薄的生理。 到26歲的時，有轉業來佇現時的所在經營農業，直直到佇伊過身的日，做1e5篤農家佇南崁。

 論吳長老對國家、對教會、對家庭e5貢獻，我ai3排列淡薄，thang hou7咱相kap榮光上帝e5名。

1. 對國家的職務。佇帝國(日本)領台當時，明治29年（1896年），有擔當分結首，佇32年(1899年) 有當選做總結首。33年(1900年)受命做臨時土地調查委員。34年(1901年)受選做保正，（保甲制度對這年創起），直直繼續到佇現今，攏m7 bat lang3 cham7。38年(1905年)受命做南崁公學校學務委員。39年(1906年)受命做土地整理委員。大正9年（1920年），有擔當區總代。佇大正4年（1915年），有出力鬥招呼勸勉人來加入南崁信用組合，續受揀做評訂委員。其他受10外團体的囑託，講be7盡。對佇伊有忠實，伊的工有貢獻佇社會，致到有總督的表彰5擺。閣再總務長官、州知事、廳長、郡守、庄長、其他各團体的表彰數10擺。這會thang証明吳長老的盡忠報國。

2. 對教會的職務。吳長老原來是熱心信偶像宗教的人，不止有宗教心。佇明治23年（1890年），南崁初設基督教會的時，對佇伊的宗教心的表現，有勇敢來研究道理。到知這個宗教是真的時， 就放棄伊前所服事的，來領受主的福音。 雖然hou7人恥笑，攏無搖choah,一發熱心；佇明治35年（1902年）受揀做執事，盡力佇執事的工，出力佇拜堂的改築。明治38年（1905年）受揀做長老，直直到佇臨終的日，攏無斷cham7。常常去赴中會，也bat去赴大會，bat伊的人攏呵咾伊的信德。伊近年較濟歲，耳空重，所以無去赴中會；總是伊路尾擺的赴中會是7年前(1928年)，抵抵是伊的後生吳天命受設立做教師的時，上帝的攝理 真奇妙。

3. 對家庭的職務。Thang講吳長老有大興起的家族。伊佇3歲的時老父過身，伊的老父兩兄弟，只有見伊1人thang傳嗣。佇這款的時，得著賢母的牽成佮上主的致蔭，伊有長成，建置家庭。伊佮長老娘結婚已經60年久，人teh講呣bat看見in相加話。Thang講 真和睦，相佮奉養老母，養餇牽成序細。相佮信 主領受主的恩典。對in這款完滿的家庭，上帝有賜in 50外個序細佇in 的身邊，60年久對in兩人有傳，若含外孫續算，有倚80 外人。對chiah 的序細，伊真gau5牽成教育，雖然伊的家計呣是富裕，iau2 ku2 gau5 chhiaN5 ti5序細。大子（吳蘭桂）細子（吳愈信）有設法續接伊耕農。第2子（吳逢春）做醫生，第3子（吳天賜）做藥局生幫贊二兄。第4子（吳天命）獻hou7主，現時擔任台北神學校教師。查某子的中間 也1個獻hou7主，現時佇淡水女學院做舍監，栽培女子。其他的孫也是攏棟樑的。大孫有擔任南崁教會的執事。大子 這擺有受揀來接伊做保正。閣再伊真致意引chhoa7 chiah 的序細來拜上帝，不時掛慮序細的信德。實在thang講對家庭的職務有盡。

有幾若項thang hou7咱數念伊：

1. 熱心信主。吳長老m7 bat歇睏禮拜日頂下晡的聚會，若有歇睏，是出外抑是身軀無爽快。常常佮傳教者去佈道，伊較常是用聖詩來傳道理。真gau5体貼傳教者，若bat去南崁擔任的傳道者，就攏知伊的疼心。

2. 清氣心肝。熱心信主的結果，有hou7伊的心肝清氣，伊攏是講出好話，我來南崁頭尾5年久，毋bat聽見伊講粗魯的話，無對講話來跋倒。吳長老實在有純潔佮美麗佇社會人群中，無m7超過眾人。逐人欣羨伊的清氣相。

3. 上帝盡忠e5奴僕。吳長老真gau5鬥幫贊教會的工。做長老也歡喜鬥幫贊執事的工。真克己，甘願降低來服事人，所做有利益人。看世人teh枵，teh嘴礁，常常將主的道理hou7人lim, hou7人食。Thang講伊是主所疼的新娘。

4. Gau5行孝伊e5老母。我有聽人講，南崁有出2的孝子，1的是吳長老，koh 1 的是張執事(張福來)。伊常常佇子孫的面前，來講明伊的老母的事，勸勉in來數念伊。

吳長老這款的信徒，有得著主大祝福伊，hou7伊長歲壽，得著紀念鑽石婚的日子。閣伊的序細攏有toe3伊的腳步服事上帝。Thang講伊是主的新娘，內外攏媠，佇早早就hou7耶穌過訂，到佇(1935年) 8月25日就hou7耶穌娶去。伊beh過世的時攏無掛慮，因為世間的事伊攏創明白，嘴攏是講面的事，腳phoat來phoat去，人問伊kan2 beh an2 ni，伊講耶穌佮我佇leh，聖神佮我佇leh,我teh行路beh來去天堂，全然無1屑仔的憂愁。實在真感謝 上帝的所在。

人一下聽見伊死，真呣甘，眾議一決，就扑四塊石碑來chhai7佇伊的墓nih,做久長的紀念。庄長1塊寫講「奉公至誠」。保甲聯合會1塊寫講「克職廉正」。信用組合1塊 寫講「始終一貫」。南崁教會1塊寫講「為主忠僕」。伊實在會堪得受這4款的稱呼。

佇9月3日有告別式，有官廳、民間、以及教會幾若百人來會葬，有濟濟人讀弔詞，也有弔電幾若十張。對台北方面有幾若個牧師來會葬。偉彼得牧師(Rev. J.D. Wilkie)、神學校學生攏有備辦弔詞來哀弔。咱有這款先輩來造就這cham7 的好歷史佇教會，真正是榮光的所在。今伊iau2有長老娘佮遺族，向望上主安慰in頭到尾，gau5 toe3 in 的序大的腳步來行天路。