蕭登壽報 《台灣教會報》494卷1926.年5月 p.15-16 [白話字原文，改為漢羅台文]。

土庫的長老吳駝，於1926年1月21日去世，享年47 歲

吳駝君是土庫的長老，伊對16 歲就聽道理，20 歲入教會，25歲做執事倚10年久，就升做長老；到今年(1926.年) 47歲善終。今將伊的履歷大概記佇下面：

伊一生散鄉（貧窮），總是不止克己，歡喜獻金佮出工，真熱心，禮拜日真對重，除去病痛以外，毋捌無守禮拜日，時常佮傳道先生抑是會友去探兄弟姊妹佮佈道，親像斗南若開佈道會的時伊攏有來，閣斗南的福音堂大部份是伊來做主理。見若關係教會的代誌，伊真歡喜出力鬥幫贊。到伊臨終的攏無變換，真可取。不幸大正12年（1923年）12月發病，到13年2 月去新樓醫館手術，入院35日久倒來厝裡。閣去遐打堞（治療）月外日閣倒來。伊有閣去1 擺，以後佇厝裡治療。到佇（1924年）正月21日離開世間，22日出葬，不止鬧熱。伊佇病中不時teh掛慮教會的事。伊的心肝平安，無艱苦歸主。

伊的老母佮伊的婦人人真熱心閣賢德。4 個後生，1個公學校卒業，3個猶未,iáu有3個予(hou7)會友。伊所開的錢，大部份是伊的小弟吳岌（khip8）君支出，真有兄弟情。大概是以上所記，按呢真thang hou7咱做模樣。請列位替伊的家族祈禱，是心所願。