「顏阿鶴」《台南府城教會報》345卷1913年12月 P.8-9

按：顏阿鶴是顏永成．洪先河(永嬸)的長女，是顏振聲(醫生、長老，1876-1949)的姊，適吳道源（醫生、長老，1868-1928）為繼室，於1912年在廈門過世。

顏氏阿鶴，囡仔的時蹛佇苑裡街(善化)，是官家的女子，永嬸的大查某囝。 生成靈巧有膽力，得著父母真疼惜伊。

原本全家攏是世俗，伊的老母先得著道理，就設法hōu伊來女學thang讀冊。入學hit-霎心攏無欣慕主的道理，到後來漸漸受感化，明白真理，領洗禮入聖教。

查某囡仔若beh入女學攏著留腳。阿鶴 hit時無án-ni，是beh試看伊蹛女學會tiâu á-bē。後來伊知人縛腳是無合主的教示就留腳。為著這個代誌hōu in家內的人kài受氣，若放學伊攏m̄敢倒去苑裡街，著去蹛 in 母姨兜。踮學內若看朋友破病，真gâu照顧in。倒去in厝有感激in 的親人，前in受氣，soà變做歡喜接納道理，無loā-久通家攏信主。

(女學) 卒業了就配吳道源先生，gâu 治家， 公平款待伊的囝兒，罕得有人親像伊 hiah有公道心，也大幫贊丈夫。這台南市內有三位設拜二的祈禱會，東門，太平境，西門外。吳先生娘佇這西門外的祈禱會不止鼓舞，有時作主理，有時招人來赴；起頭piàⁿ伊的厝hōu人聚集。

佇1912年吳先生去廈門做事業，先生娘也toè伊去。蹛 hia日日ná 勇，無拍算近日有接著電報講：伊hōu症頭 lah， hōu人gông-ngia̍h. 過無幾日就kap世間相辭。聽人講是腦出血。

可惜放真濟囡仔無母thang照顧;，siāng 細hōu度晬外，咱bē免得替伊煩惱。論這人來信主，一項是對in老母的出力，一項是對姑娘gâu引chhoā；又koh一項是女學的學生常常替伊祈禱，咱猶原著用án-ni來體貼伊家內人，thang ké in 的憂悶，加添in 的安慰。