陳泗治講 「偉大的平常人」《台灣教會公報》 856號 1960年 4月 p.12-13

按：吳天命牧師於1960年月日去世，1960年1月13日下午假台北濟南長老教會舉行總會葬，以下是陳泗治牧師在葬式報告「故人略歷」時所講的。請參見吳天命牧師生平年表。

我拍算佇台灣真罕得看著一个人的過世，予遐爾濟人聽著彼个消息的時，到遐爾大的楞愕。除去伊的遺族佮親族以外，遐爾濟人為著按呢來悲傷，啼哭，流目屎！吳牧師過世的消息，無論傳教佇都2一个耳孔都袂得通予伊信伊所聽的是無毋著的。逐人楞愕到喙講袂出！

今到底是為著甚物原因？是為著伊是這个偉大的先生抑毋是？是為著伊是這个偉大的教師抑毋是？抑是為著伊是一个偉大的神學者？抑是為著伊是一个偉大的牧師佮說教家？雖罔是短短的教會政治生活，猶過毋知是為著伊是一个偉大的教會政治家抑毋是？

請大家容允我對使徒行傳第4章來借一句話。咱會記得彼得佮約翰予人掠去的時，遐的長老，經學士佮祭司頭，看著彼得怹活佇眾人的面前，閣認得怹是「無學問的平常人。」今我愛借這句平常人來想吳牧師是一个「偉大的平常人。」怎樣按呢講呢？論伊的履歷我毋免閣重複，因為有寫佇這張順序單的後面真詳細。

我講伊是一位偉大的平常人，就是因為伊雖罔做先生，伊毋捌一擺驚學生會僥疑伊無把握，抑是驚了學生佇後面來批評伊講，毋知這个先生有資格通教怹仔無？伊毋捌一擺佇教冊的時刁工來攏用原語，親像希伯來語，希利尼語，抑是甚至英語。彼時去日本留學轉來的人猶過少，總是伊真罕得對阮講，「阮彼當時佇東京的時怎樣......怎樣......。」伊無！伊是做一个真平常的先生教阮「舊約神學」佮「系統神學」。總是我會記得，雖罔伊是北部只有一間的神學校的重要科目的教授，總是伊毋捌家己想，台灣長老教會神學的方向是伊teh決定，伊teh注意，佮人論爭到面白，耳紅。伊毋捌予阮看見這款態度。真普通的神學教授。

我相信到一个教會做牧者，伊嘛毋捌一擺欲用伊本身做一个真gâu的牧師，用彼款的態度來teh牧會這間教會。抑是論說教來講，我雖罔對伊的說教得著真濟感動佮利益，猶過我相信，伊無家己teh想伊是一个偉大的說教家。聽見講，頭一擺這个教會家己謙卑講，「伊的說教無彼个價值。」

閣伊雖罔做教會的政治家，教會的政治也有關係，總是我相信伊無家己想，相時伊也無愛人按呢想伊是這个真正會得通負起真大的責任的教會政治家，抑是權力佇伊的手。無！伊是真普通。總是就是為著按呢，伊是偉大！

伊拄拄伊的本身予咱看，予人捌伊，予咱學伊閣按呢講話，做事佮生活。無欲激較懸，激較低：也無誇示伊的學問，自負伊的深造。遮的伊攏無，kan-ta照伊所有的，所有排佇咱的面前。不管你欲尊敬伊，抑是欲看輕伊，攏一概不管。伊kan-ta照伊的款式來表現伊的款式。我講，「偉大的平常人，」就是在這个！！

吳牧師就是親像我所講，這款的先生，神學者，牧師，說教家佮教會政治家，所以咱真快就近伊，真歡喜佮伊講話，無裝飾，無假做，放心佮伊交陪，安心受伊的指教。所以伊來離開咱，咱的心非常的毋甘。伊的聲，伊的影，伊的面貌刻牢佇咱逐人的心內。

在座的兄弟姊妹，咱著學咱的恩師，咱的牧者，咱的同勞者這款的偉大。是偉大，猶過是平常人。是平常人，猶過是偉大。伊的教示予咱傷心！佮伊相離是何等的毋甘！希望佮伊閣相見是何等的安慰佮快樂。