偕叡廉寫  《台灣教會報》532卷，1929年7月

吳廷芳傳道（1870-1929）e5本所在就是艋舺。伊ti7明治3年（1870年）10月24日出世，細漢e5時有讀漢學；到較大漢真認真研究孔子冊。到15歲hit時法國來扑台灣 （西仔反） ti7地方濟濟所在不止擾亂。Ti7艋舺hiah e5三大姓（黃、林、吳）大窘逐教會，講：「若有禮拜堂，就無三大姓，若有三大姓就無禮拜堂。」百姓大擾亂beh拆禮拜堂。Hit時吳廷芳扑鑼ti7街路，出力叫人來拆拜堂。無久幾若千人kiah8 ke si來拆拜堂。

經過幾若年久，吳廷芳就去行衙門，以及做先生（塾師）。到明治29年4月，伊搬去錫口（松山）做先生。Ti hia錫口e5傳道陳能引chhoa7伊來就近主。對敵變做朋友，孔子e5學生成做基督e5親兵。吳廷芳先生chhoe7著活命e5路koh聽見基督e5聲講，「toe3我」，伊就放sak一切來toe3主。

有1日差不多32年前，陳能傳道chhoa7伊到艋舺禮拜堂，講有1個讀冊人欣慕ai3入神學讀冊。Hit日我e5老父（偕叡理）tu2 tu2 ti7艋舺，我也ti7 leh,陳能傳道講：「偕牧師，這位先生ai3做傳道，近來常常來錫口禮拜。」吳先生穿1領青衫，戴碗帽，坐ti7椅nih8,目珠金金看我e5老父。伊就kap伊講濟濟話，續問講：「你想ai3做傳道？」吳先生應講：「偕牧師，我beh做傳道到1世人。」像hit年（1897年）吳先生入淡水神學做學生。

因為伊是讀冊人，漢文伊bat不止深，伊也真gau5寫字。Ti7台灣真濟人真欣慕伊e5字。

Ti7 1898年4月22日，派伊去水返腳做傳道。Ti7 hia幾若年久做工，kap大家不止親切。後--來去tiam3桃園、新竹、雞籠、北投、士林chiah e5禮拜堂。無論甚mih所在，伊kap眾人真快熟悉，因為伊gau5交陪朋友。

Ti7這 30年koh 3月日久，吳傳道不止殷勤做主e5工。因為伊真好口才、聲音好koh活動，對an2 ni濟濟人ai3聽伊e5演說。伊也真ai3報揚主e5福音；攏be7厭sian7,若請伊演講伊m7 bat推辭。

Ti7這幾年e5中間，伊tiam3 ti7士林做傳道，總是每禮拜伊也出力佈道ti7下奎府町禮拜堂。路尾擺說教也是ti7 hia。Hit暗伊將「愛」做題目。提粉筆寫1字「愛」ti7 烏板nih8。身体雖然淡薄軟弱，伊也是盡伊所會e5來傳。Hit日就是6月5日。到6月11日e晡4點鐘忽然hou7上主揀召。Hit早起伊e5身軀無病痛。到e晝iau2 kap家內坐桌，後來去the、歇睏， koh無偌久天父揀召伊，享壽60歲。

Ti7 6月18日e晡2點鐘ti7士林禮拜堂有做葬式。主理：張牧師（張金波），讀聖經：鍾牧師（鍾天枝），履歷：偕先生（偕叡廉），說教（講道）：明牧師（明有德），讀弔聯：徐春卿長老，答謝：吳思妹，祝禱、閉式：張牧師。然後阮送伊到ti7士林e5墓地，ti7伊路尾安歇e5所在