|
林俊育撰 《新使者雜誌》137期 2013年8月10日 p. 74-75 聖經翻譯專家，駱維仁博士講：「聖經是上主ê話語，道成肉體ê耶穌基督，就是用咱現代ê話語kah咱講話。」所以有需要hō͘人人愛讀koh讀有ê聖經，thang hō͘讀者容易明白上主ê意思，福音chiah有法度廣傳。 1933年出版ê白話字聖經（《巴克禮修訂版聖經》）是廈門話，版權頁明明寫“Amoy Romanized Bible”，kah現今ê台語約10%無仝款，咱ê信仰祖先卻勉強kā它當做台語來用，致使目前台灣教會內kah教會外ê台語有cheng差。1996年，台灣聖經公會kā它改寫做台語漢字本，真chē無適當ê漢字，顛倒hō͘台灣人koh-khah讀無。 1973年有天主教kah基督教合譯ê 《紅皮聖經》，m̄-koh tī出版社to̍h hō͘國民黨政府沒收。2007年台灣聖經公會出版「現代台語新約聖經」有kā廈門話修改做台語，m̄-koh iáu是使用北部腔/海口腔，真chē所在kah現代台語普遍腔(南部腔/內山腔)有落差。 原來kā chit本聖經號做《巴克禮普世版聖經》，賴永祥長老漸漸認同chit本台灣人ê聖經，有beh寫推薦序。伊深入思考了後建議mài落「巴克禮」ê名，了後koh講：「若是英語名號做“Common Taiwanese Bible”，台語號做《全民台語聖經》khah好。」我tńg來台灣有請教各位先進，ta̍k家lóng o-ló chit-ê名號了真好。 《全民台語聖經》是用《巴克禮修訂版聖經》做基礎，kā原底ê廈門話改做現代普遍腔台語，並kā英語語法kah和合本華語語法改做台語語法，koh kā原來「字kah字對應」ê直譯，改做容易了解ê 「功能對應」ê意譯。 台語用字主要參考「甘字典」kah「台日大辭典」，現代台語「普遍腔」是根據「教育部常用詞辭典」ê「優勢腔」，khah偏向南部腔/內山腔，因為北部人khah無teh講台語，北部腔/海口腔就án-ne變做弱勢腔，he是真自然ê現象。 語言tòe時代teh演進，真chē非基督徒ê朋友質疑講：「Lín基督徒mā teh奇怪，taⁿ都民主時代，thài會iáu-teh 「帝王」、「帝國」？原來in是teh指「上帝」、「上帝國」無合時代用語，所以《全民台語聖經》採用《紅皮聖經》ê 「上主」、「上主國度」，mā kā 「百姓」改做「人民/子民」。漢羅版ê人名kah地名，採用一般用慣勢ê漢字，罕得用.ê to̍h保留原來ê白話字/羅馬字。 新約真chē所在引述舊約經文，若有「註腳，舊約經文」to̍h會方便讀者了解新舊約ê關聯，koh-khah容易��解聖���������ê意思。巴克禮白話字聖經原本有「註腳」kah 「註中央」，真詳細m̄-koh花sà-sà，無啥好����，所以「台語漢字本」就án-ne kā它廢除掉，有夠可惜。本《全民台語聖經》無惜時間kah精力來回復chit-ê功能，採用真容易查考ê方法，hō͘ chit-ê功能��做有特色koh是人人愛讀ê聖經。 台語聖經ê人名kah地名，自��以來lóng用華語漢字直接讀台語音，soah kah原文發音差一大把，kah國際無法度接軌。���全民台語聖經》參考原文，全羅版kah漢羅+Ruby版to̍h盡量照原文讀音。漢�����������版若kā漢字讀做華語發音，mā是有接近原文讀音。 為tio̍h滿足各種ê語文讀者ê需要，本《全民台語聖經》有全羅版、漢羅版kah漢羅+Ruby版三種版本，先出版新約，chiah-koh出版新舊約全書。 感謝幾nā位牧師tī神學用語，以及幾nā位台語文先進tī現代台語ê用語，提供寶貴意見，mā tio̍h感謝真chē台語文界，無論基督徒á是非基督徒，透過網路試讀並提供真chē寶貴意見，hō͘ chit本《全民台語聖經》達到人人讀有ê目的。 Chit本革新版ê台語聖經，由李江卻台語文教基金會發行，由人光出版社承印，ǹg望今年年底以前ē-tàng出版新約，新舊約ē-tàng tī明年底以前出版。
|