|
|
巴克禮批：過太平洋 (1891) |
|
|
首頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G / H / I-J / K / L / M / N-O / P-Q / R / S / T / V / W |
||
|
新教宣教師(B) Band Barclay Barclay, Mrs Barclay,J.M Beeby Bly Brown Burns, WC
|
巴牧師e5 近來阮有接著巴牧師e5批講伊過太平洋到加拿他一路平安。總是伊另外有koh寫一張是白話字e5，愛beh hou7台灣e5教會公看，今將hit張批印ti7下底： 這(舊曆)3月15我ti7安平落船，tui3廈門、汕頭過，24到香港。安歇日e晡(下午)參本地人e5教會聚集食晚餐。Ti7- hia敢有200外人入教，也有請一個本地牧師，所費攏是in家己出。另外也有別間e5拜堂，我卻無去看。拜一e晡參外國e5先生、先生娘聚集做祈禱會。Hit-tiap8 in ti7-hia因為兩項代誌teh感謝上帝。一項是因為近來香港e5官府有設法beh禁hia-e5 kiau2間(賭場)，可惜現時ti7-hia局真盛。Koh一項是官府也teh設法hou7行船e5人thang守安歇日(安息日，主日)。前chiah e5船若到位就直直起貨落貨，無論安歇日也攏無停。今官府beh禁in m7-thang，若是安歇日著歇睏。設使有人講in e5代誌真迫，不得已著做工，in tang去稟官府准in，總是著罰銀幾若百箍，所罰e5濟少是照船e5大細。這層m7是因為官府ai3趁錢，是表明代誌真正切要，hou7人be tit ui貪財e5緣故來推辭講是扑損工。這隻船管大車e5有ka7我講，照伊所bat經過，人若守安歇m7-na7伊e5靈魂較平安，身軀較爽快，又koh伊所做e5工be7較輸別人e5。親像伊chham伊e5腳手做六日歇一日，kiam2-chhai2別人直直做無停，iau2-ku2 hia-e5人所做e5工be7較濟伊e5。可惜有時chiah-e5薪勞頭家無這號e5意思是較難。所以濟濟人teh歡喜，因為官府設這個法度，今in e5頭家姑不chiong著趁。 我3月27 ti7香港koh再落船；這隻船比來安平hit號e5幾若倍較大，m7-ku2 iau2有船比這隻不止較大。阮外國人搭客差不多50人，日本人50外人，唐人300外人；行船e5人、煮食、排桌hiah e5總共也成百人。船也gau5行，一日一暝行差不多80舖路。現時tu-tu2 teh過太平洋；tui3日本到亞美利加著行13暝日較加，水路e5中間也攏無看見山，四面攏是海水。總是be7艱苦，無甚mih風，湧也靜靜；我一路攏無暈船。客廳也夠額爽；若beh看冊、寫批、彈琴、tioh棋攏thang; Ti7船頂也thang四界行，也有人扑球。安歇日聚集禮拜攏是我teh做，船裡無別個牧師；逐早起阮幾若人也聚集禮拜。 船裡e5漢人是廣東省e5人；我幾若過有去，ai3 kap in講話，chhoe7無一人bat咱漳泉e5土音。Tui3中國到亞美利加in e5船租著差不多80箍。到位beh入加拿他國，in也著出80箍e5徵餉銀hou7官府，才准in入。現時人m7准in入花旗國(美國)；總是kiam2-chhai2有e5 ai3-beh偷入。Hit爿e5工錢較好趁，有人ka7我講，到位我若ai3 hou7人洗衫，每件著算兩角半銀hou7 in ! m7知有影抑無。 今仔日是拜四，是阮e5(指新曆) 5月21，昨暮日也是拜四是5月21，就是這禮拜e5中間有兩個拜四，平平是第21日。其餘拜一、拜二猶原攏齊ti7 teh，就這禮拜e5內面算8日。這個代誌是難明，人著講究天文才會曉tit；我na7 ai3講起hit個意思，驚了lin2 be7曉tit聽。總是這個理氣m7但lin2 be7明；照我看船裡e5朋友濟濟個be7曉tit因為啥事，才著算an2-ni。設使人無親像an2ni重算一日，就be7用tit，到位會攏亂。阮到hit日，人ti7山頂若叫做拜三，阮ti7船裡叫做拜四，所以ti7路裡著加算一日正會和。船若倒轉去日本，著顛倒tang3一日，無算；猶原是hit個理氣。 頂面所寫是拜四寫e5;今仔日今過禮拜e5拜三。阮已經有入港，向望下昏會到位。願lin2大家平安。我愛常常聽見lin2好e5消息：「大家那篤實靠救主來趁伊e5教示，koh大大加添人額。」
首頁Home/ 本土信徒總檔 / 教會史話總檔 / 宣教師人物總檔 / 洋神父修女列傳 / 日人列傳總檔 / 原住民信徒 / 諸家論述
|