劉改造先生（1926-2012）略歷

遺族提供（劉克全主稿）。 劉改造先生，2012年6月26日去世，享年87歲，7月5日在台南太平境基督長老教會舉行追思禮拜後，安葬於基督教墓園。（劉改造是賴永祥長老娘劉慶理之弟）

劉改造先生，1926年1月1日出世佇日治大正時代，是台南市望族劉瑞山先生大孫，劉青雲先生長男；母親是本目 貞，本目家族原姓松平，是日本德川幕府將軍的「旗本」。 改造先生有大姊慶理（去年別世），小弟是革新、逸民、備世三人。

伊細漢時陣入學台南花園幼稚園、花園小學校，中學入學州立台南一中，佮梁清榮執事兄哥以及濟濟日本人攏是同窗。自細漢著定定跟綴父母坐船去東京旅遊探親，自細漢學習日本、歐美文化，思想開明先進。自細漢佇劉家和源祖厝長大，是十外位叔伯小弟小妹的大兄，伊是家族的囡仔王，受著逐家敬疼。

二次大戰1943年註冊入學日本東京早稻田大學，後來因為戰亂，社會不安，糧食缺乏，無飯通食，受苦受難，經過長輩紹介，位東京坐火車兩日前往九州長崎，坐船兩日前往中國上海日本人佔領區讀「日本東亞同文書院大學」，讀冊期間受命前往南京成做日本學生軍兵，伊雖然無參加大戰，一面讀冊一面當兵的日子嘛是過了真緊張真辛苦。1945年日本戰敗，轉來台灣，隔冬讀台灣大學法商學院政治經濟學系，因為伊佇中國有學北京話，所以成績誠好。畢業了佇台南高商擔任會計學先生，本教會王南傑牧師、嚴俊良長老，攏是伊的學生，以後受長輩指派，管理三多商會以及家族農場事務，是一位家族理財士。

改造先生佇1950年2月佮台南名醫施震炎醫師第二千金施禮理小姐佇太平境教會結婚，結婚後有二男一女，長男格正夫婦佇美國北卡(North Carolina)經營房地產買賣厝宅管理，事業成功；二男克全已經位台南 YMCA 副總幹事職務退休，目前佇小學、中學擔任台語教師，多次得著台南府城文學獎；長女純真蹛佇美國北卡，囝婿林英宏早前佇美國休士頓郡政府服務，設計工程，有教會、有公園……，目前佇北卡州政府衛生部擔任建築工程審核師。改造夫妻有內孫5名，孫新婦1名，孫囝婿1名，外孫2名。孫輩讀冊攏誠認真拍拼，有3人已經提著碩士學位。

改造先生日本時代佇台南日本人衛理公會教會受洗（青雲先生所開拓的教會），戰後佇太平境馬雅各醫生教會禮拜。侯書宗長老、蘇承家醫師、傅再生先生、吳鶴松先生攏是伊早前的好朋友。伊休閒活動愛釣魚、飼狗仔、收集郵票、栽花、拍Golf，嘛真*修理汽車、電器用品。

改造先生是「半个日本人」，東京是伊第二故鄉，八十冬來時常前往日本、美國旅行，佮親人囝孫聚集，踅古蹟、散步、釣魚享受人生，85歲猶閣會騎機車佇故鄉台南拋拋走。最近因為跤手較無力，定定跋倒入院，5月21日跋倒入院手術腦部了後著無清醒，6月26日午前一點蒙主恩召，享年87歲。伊一生誠平凡，無做大官大事，伊時常關心奉獻教會，今欲睏佇伊阿爸青雲先生的隔壁，願逐家紀念伊。