|
|
一生ê回想 |
|
|
本文原刊tī 1994年6月多倫多台灣同鄉會會刊「多城通訊」 相片kap括弧內ê按語是LES新加ê 我tī 1904年（4.29）出生tī台南市元月境街，我今年（1994年）已經滿90歲，感謝上帝特別ê祝福kap照顧，hō͘我心神健康。 我ê阿爹是劉大粒（劉光求次子，1865-1937），阿母葉巧，我九歲ê時老母去世，我是排行第三ê女兒（大姊富，嫁李明道；二姊玉，嫁簡仁北）。父母真早tō信主，是一個基督教ê家庭，我只有一個兄哥（幼毛），細漢ê時kap小妹去太平境教會讀主日學，老師是高候青蓮（高再得醫師娘），就是高俊明牧師ê母親。後來，我讀東門女學校，koh進入新樓女學校，就是現今ê長榮女中。我四年畢業後，就幫忙父親 ê店務一直到媒人來提親。
Hit時我已經二十歲了，對方是一位讀台南師範第一屆ê畢業生，是屏東萬丹ê人李志傳（1903-1975）。因為伊在學ê時成績優秀，所以留tī本校附屬公學校擔任教學。我ê
父親疼愛女兒也有去探聽， 婚後，阮有真美滿ê家庭，志傳tī附屬任教六年滿，（1928年）就去日本深造，讀東京帝國音樂學院。伊非常愛音樂koh有天份，畢業後，hō͘教授留tī本校做助教，然後昇做副教授，暑假ê時轉來台灣，chhōa阮母kiáⁿ去日本世田谷中原，tòa kúi-nā年。 在異地想起故鄉有年老ê母親需要有孝kap照顧，所以（1933年伊）就回台，對hit時開始，tī屏東高等女學校教學，總共有十六年久，也昇做高等官，亦有做真chē 曲。光復後，伊擔任屏東高女ê校長有三年久。然後去台北市政府擔任督學。Tī台北ê時，特別組織教師交響樂團，熱心教育。伊tī教育界五十外年ê貢獻，到 65歲退休後，tī台北嶺頭台灣神學院擔任音樂主任。 阮攏總有四男六女。大kiáⁿ（秋笙） tī日本橫濱讀醫大，現在tī東京自由丘開業婦產科醫院，tī東京神教會事奉。二kiáⁿ（東啟） tī台北一銀總行就職30外年，差不多beh退休了，現在tī台北仁愛教會。三kiáⁿ（省三）是日本福島讀醫大，現在tī福島開業外科、胃腸科醫院，也tī福島市基督教會做執事。五kiáⁿ （信雄）tī多倫多SPAR公司就職20外年，現在tī多倫多基督徒之家事奉。大女兒（琴月）以前tī台北和平國中教28年，現在已經退休tī 多倫多。二女（尚美）以前tī屏東女中就職真chē年，現在tòa多倫多，tī聯合教會事奉。三女（春美）師大畢業後tī大同中學教音樂，現在tī美國印地安那州ê白人教會事奉。四女（惠美）師大美術科畢業，tī台北市女中教美術，現在tī明尼蘇達雙城教會事奉。五女（壽惠）銘傳高商畢業，前在育達商業專科教銀行會計，現在tòa多倫多，tī聯合教聖歌隊。六女（滿美）台灣大學醫學院畢業後，去美國羅鎮市，前在梅友醫院就職九年，現在夫婦tī查經班kap白人教會事奉。 Tī第二次世界戰爭ê時，物質欠缺，疏開去舊寮鄉下，我hō毒蛇咬tioh，生命危險，佳哉無死，感謝上主ê保護。我也勤種菜、果子、木瓜、kin-chio、han-chû等等攏有，當時是何等辛苦，但是總講一句，感謝上帝ê照顧阮攏平安。
阮注重kiáⁿ兒ê教育，tùi細漢來認bat主，大漢chhōa弟妹去hù主日學，有相疼，有規矩，因為主ê教示，勝過一切，阮心就平安，現今每家庭ê
人攏khîn-tiâu
tī主，che是上帝特別ê祝福kap恩典，阮感謝無盡。
Tī 18年前（1975.12.29），我ê丈夫忽然心臟發作去世離開阮，我非常傷心，不知如何。但是一切攏是主ê旨意，我beh
the̍h出勇氣，有主ê安慰。聖經教示咱，你若憂悶，著愛祈禱，你若歡喜，tio̍h-ài吟詩，萬事交託主，ài用誠實ê心，主會替咱開路。
|
